நீலக்கடலினை இரசிப்போமா
----------------------------------------
நீலக்கடலினை பார்ப்போம் வா – அதில்
நீந்தும் ஓடம் இரசிப்போம் வா
துள்ளும் கடலலை இரைச்சலிலே
துரத்தி நண்டு பிடிப்போம் வா

சிரித்து மகிழ்ந்து மடிநிறைய
சிப்பி சங்கு சேர்ப்போம் வா
சரிந்து சரிந்து கடலலைகள்
விரைந்து வருவதை இரசிப்போம் வா

மிதக்கும் கப்பல் பார்ப்போம் வா – அங்கு
மீனவர் வாழ்க்கை அறிவோம் வா
மண்ணால் வீடு அமைத்தங்கு
உடைத்து உடைத்து மகிழ்வோம் வா

காலைச்சூரியன் பார்ப்போம் வா - அந்த
காட்சி இறைவன் சாட்சியடா
அந்தி நேரம் பந்தாட நாம்
அம்மா அப்பா அழைப்போமா

-கிராமத்தான் கலீபா-
பொத்துவில்